Minguel Rod

MINGUEL ROD

 

Goyenche bhuimyencher zaitinch mankam motiam porzolleant. Ho tancho porzoll tanchea apleponant thaun uppzola anik tho sogleak ximpodla.Zoxem ek chiklantlem porzollit sallok fulta vo ek barik kuskukattachem ximpeanim mannik zata teach porim ek kolakar zolmant yeta. Oslem ek mannik amchea Goyenche matientlem jem konknim machier porzollem tem zaun asa Malghoddo Tiatrist Minguel Rod.

 

Minguel Rod ek krantikari , ek asamanya budhicho vyokti zaun aslo. Oxem mhunnpak karann asa ani tem mhunttlear tannem je tiatr boroileat te tea kalla voilea bhattkarshahi, zaticher mandtelancher, anik somazik vixoyancher. Mhuntat kim unchlea zatiche munis tea kallar tiatr pollounk yenasle fokot sokoile vorgantle ani xinko naslele lok tiatr polletale. Punn Minguel Rodache tiatr sogle torecho lok pollounk yetale, lohu lipon tori yevun polletale, kiteak Minguelachea boroupant tankam kitem tori aplea somazantlem pollounk mevtalem. Anik heach passot tiatr pollenar vaddle ani choddle. Sogle mellon 32 Tiatr tannem boroile. “Koddu Sounsar ho tacho nimnno tiatr zo tannem boroilolo. Tachea morna fattlean tacho tiatr “Open to Close” Goyant dakoupant ailo ani tantun tachea putan Jr. Rod-an  ek kantar mhunttlelem.

 

“Aikotoch Pai Raddiar tosso gramaphonar tallo tujo,
Tum assai so dista jivo, pun amchea noxiban pai tum na favo”.
 
“Kitlech pai tuvem tiatro boroilei bookar,
Pun tanchim solfam sarkim nant mapar,
Toxech kitle tiatro amkam tuje mellonk nant sabar,
Haddun dixeat tor vhodd zait upkar”
 
HMV recordancher aslelim Minguel Rod-achim voznadik kantaram aiz passun akshvanicher yetat tim lok gostan aikotat. Hea kantaranchem mohtv mhunnchem tachim ghoddpam itlea nazuk sobdanim vinleant kim tachim kantaram aikopak umed bhogta. Sumar 300 vhoir tannem kantaram ghodleant torekvar vixoyancher. To machier kantar mhunpak ailo mhuntoch lokancheo ueli podtaleo. Porot porot thaka tench kantar mhunonk apoitale. Tachea kantaram vorvim to bhorpur lovkik zalolo. Tea khallar to tiatrant asop mhunttlear tiatr full zatalo. Tachim chodd gazlelim kantaram ‘Tarvotti’ Rumpapa Dhumpa” “ Dothik rodta’ kitlexea zannachea thonddar asat.
 
Anik ek ugdass korpachem mhunttlear tancho khoddegant pongodd ‘KID-YOUNG-ROD’ ze trio’s ghaitale te aikonk lokanchi gorddi poddo. Sangtat te bhaxen ho trio asop mhunttlear tiatracheo tiketti adinch fuddem kobar zataleo itle lokak te avoddtale.
 
Hanvem adinch mhuntlelem kim Minguel Rod  goyenchea tiatrachea molleant ek krantikari , ek asamanya budhicho vyokti.
Koslench upcharik xikxon nastanam tannem itle bore tiatr ani voznadik sobdanim guntlelim kantaram ani Cant koxim boroilim hacher vichar korpa sarkem. Tea vellar tannem dothi gheteleancher nixed porghotlolo, tea kallar bhattkarsahicher avaz uttoilolo, tea kallar ostoreanchea hokha khatir zuzunk ulo marlolo, ek okhond ani voznadik  boroupi digdorspi ani kantorist zaun ghelo. Atanchea pillgen toxech tiatristanim hacher bariksanin niall korunk chodd goroz. 
 
Salam tuka sorgest Minguel Rod.