PREM KUMAR
06th September 1929 to 12th October 2007 
‘Dusmankayeche kantte zavn asat odruxttache fantte. Borem korxi tor borem bhogxi. Uddonakai lavn vhoddponnache paktte. Vavurxi korunk nixontton peleachem tor zait ghott’tton tujem. Kor mogachea vantte. Xegunnache razvoddken ugtte asat darvontte. Bhov Povitra Kallza Jezuchea uzvaddan amkam bhor. Khaltikayen zolmank ailolea Devputra Tujea denneanim amkam bhor. Tujea somurthi khala tuje seva chakor… Prem Kumar
Prem Kumar hem nanv Konknni tiatr machier khub nanvlovkik asa. Khorem nanv Pedro Xavier D’Costa. Prem Kumaran Konknni tiatr machier zaytim namnnam zoddlim. Boreantlo boro kolakor,ek vixesh borovpi, ek khoddegant digdorspi ani gitam ghoddpi zavn ghelo. Tannem zaiteach tiatranim bhumika keleo ani tea xivai Hindi chol-chitramchoi thaka onnbhov aslo.
Chandor ganvant Guirdolim vattarantlea Prem Kumar Setembrache 6 ver 1929 vorsa zolmant ail’lo.
Svotache pon’nas ani panch tiatr borovn palkar haddleat veg-veglea vixoyancher zaum te kuttumbik, somajik, dhormik.Chodd xe des bhokticher Tiatr boroilele hanvem pollounk nant pun Preman Des bhokticherui ‘Jawan’ nanvacho tiatr boroilo. Tachea Tiatrache sonvad unch sahitik dorjeache astale. Tachea hathborpanchem pustok to bore bhaxen ‘binding’ korun dovortalo hem vui hea tiatr mogyeamchem khaxeleponn.Tachi borpavoll itli suadik astali ki ek ek sonvad tannem boroilolo monacher probhav ghaltalo. Bhattkar Munddkarache sombonda vixim zaitench tannem boroin dakoilam. Mortikar tiatrantlo ek sonvadacho ulekh korin dista mhaka.
“Fott mhojean ulounk zainam ani soth tujean aikonk zainam. Nodor mar heam oskot munxeancher, zannim bhattkarachim xetam khonddlint, penkttak bhag ghalun, xetam nagorlint ani tanchim bhenddam bag poddon vankddim zaleant tim ubhim zainant. Zannim matheavelo gham payanche naxxer pavosor koxtt korun bhattkarache kodde bhatan bhorleat ani apnnacher oskotay voddun hadli, pun bhattkaranim tankam kitem dilem? Khonttancho mar, ani to mar tanchea koxttanchem mol mhunn sozmole, dekhun tanche oskot pirayen tankam bhikek xevttileat.Hanv te onnithichi gomtti katortolom”.
Prem Kumar hannem machier novlam korun dakoilim. Background screening filmancher kaddun aple dekhaveak anikui rong hadtalo. Firti machi, Mortikar tiatrant slides uzar korun ek dusrech torecho probhav aplea prekshankanchim monam bhulgaitalo. “Jawan’ tiatran mhaka ugdass asa tannem rondgadde pasun dakoilele. Ek cant ghaitanam tannem ek ek verse ani chorus fattlean scenes dakoilolo ani xevottak pausant tim dogaim kolakaram bizoun yetalim. Cholchitrant zoxim zogddim anim maramari dakoitat teach porim to machierui dakoitalo fight specialistank haddun.
Tannem tiatr machiek yogdan dilam tem sango kobar zaunchenam. Prem Kumar tiatrache ithasant ek loklokit divo zalo.
Tannem aple tiatr Indiek toxench ‘Middle East’’ Gulf desant dakhoile. Tannem boroilole ani digdorxit kelole tache tiatr :- Poilo tiatr tannem tera vorsanche pirayer boroilolo (1) Mhozo Put (2) Ghatki Vhoni (3) No Vacancy (4) Guneanv Konnacho (5) Mhozo Novro (6) Tufan (7) Maka Loztai? (8) Soirik Keli (9) Vadiv (10) Kazar Zaina (11) Putak Kazar Kelo (12) Afrikar (13) Darunn (14) Nimnni Chittt (15) Angonn (16) Ghor Mathiechem (17) Dukh (18) Konnank Mhunno Mai (19) Pai (20) Amchi Bhas (21) Upkar (22) Ugddas (23) Rekad (24) Kakut (25) Mortikar (25) Vavraddi (27) Gorib (28) Peleachea Vostuchi Axea Korunaye (29) Dorji (30) Dubav (31) Jawan (32) Pisso (33) Maria Magdalena (34) Jivit ek Sopon (35) Fulam ani Kantte (36) Vantte (37) Rinn (38) Upkar Naslolo (39) Fottkiro (40) Abdul Narayann D’Souza (41) Noxib (42) Kaido (43) Ordhi Bhakri (44) Viswas (45) Noxibacho Khell (46) Hanv Kitem Korum (47) Govai (48) Khotto Poiso (49) Noxibacho Divo Palovlo (50) Abru (51) Tum Modem Poddonakai (52) Tuje Dis Bhorle (53) Doyallponn (54) No Time (55) Lojechim Khotam.
TIATR 4U 